ගමේ කෙල්ල හා බැලේ නැ‍ටුම.Ballet dance in Sri Lanka????????????

සමහර දේවල් තියෙනවා අන්තිමට හොඳ කරන්න ගිහිල්ලා අපි අපිවම බයිට් කර ගන්න.පහුගිය දවසක මේ මංතුමාටත්  වඳින්න ගිය දේවාලයක් ඉහේ කඩාගෙන වැ‍ටුනානේ.

අපේ ගෙවල් ගාව අලුතින් බෝඩිමක නවතින්න ආවා ඉටිකිරිස් යුවතියක්.මට වඩා අවුරුදු 3-4 විතර බාලලු.මමත් ඉතින් ඒ ළඟ පාතින් යන එන ගමන් ඒ පැත්තට රබර් ඇහැ දාලා බැලුවා මොකද අර බයිබලෙත් කියලා තියෙනවලුනේ “අසල්වැසියාට ප්‍රේම කරන්න “කියලා.

කෙල්ල නම් ලස්සනයි.හැබැයි ඒක ග්‍රාමීය ලස්සනක්.ඒ කියන්නේ අර ගැමි ළඳක්.කෙල්ලට අපේ පැත්තේ ඉස්කෝලෙක ගුරු පත්වීමක් හම්බවෙලා.ඒ කියන්නේ ඇය ගුරුවරියක්.(කොහොමත් ඔය මිස්ලට කොල්ලො හරි මනාපයිනේ,මොකද එයාලා හැමදාම කියන්නේ ඊයේ නවත්තපු තැනින් අද ආයි පටන් ගමු කියලනේ)

කොහොමින් කොහොමින් හරි මේ යුවතිය එක්ක බාසාව දාගන්න මට පුළුවන් වුනා.මොනවා වුනත් මේ කෙලි පැටික්කි අර නියම ග්‍රාමීය විදිහට හැදිච්ච කෙල්ලක්.යම් විදිහකට කිව්වොත් හද්ද ඩොටේක හැදිච්ච වැඩිච්ච කෙල්ලක්.එක පාරට කතා නොකරත් මට මං දන්න ජිල්මාට් දාලා කෙල්ල මගේ නංගී ගාණට සෙට් කරගන්න හැකි වුනා කියමුකෝ.

නංගී විදිහට විතරයි,වෙන මොනවත් නෑ.

මෙයාගේ නම තමයි වත්සලා.අපේ පැත්තේ ඉස්කෝලෙක නැ‍ටුම්  තමයි උගන්වන්නේ.ඔන්න දවසක් එයා ඇවිල්ලා මගෙන් පොඩි උදව්වක් ඉල්ලුවා.

මොකක්ද උදව්ව.මොකද ඕනම කොල්ලෙක් බලන් ඉන්නේ කවුද අද මගෙන් උදව් ඉල්ලන් කෙල්ල කවුද කියලනේ,ඇයි කොල්ලො එච්චරම පරිත්‍යාගශීලීයිනේ,නේද?

කෙල්ලට ඕන වෙලා අපේ අර ඉස්කෝලේ (මතක තියාගන්න මේ ඉස්කෝලේ බාලිකා පාසලක්,නිකං නෙවෙයි ජනප්‍රිය ගනයේ එකක්) පොඩි පන්තිවල ලමයි ටික අල්ලන් එක වසරට ලමයි ගන්න දවසට තියන පිළිගැනීමේ උත්සවයේ බැලේ නර්තනයක් නටවන්න.(මට බැලේ නර්තනයක් කිව්වම එක පාරට තේරුනේ අනේ මට මේ නටන්න යන්න කතා කරනවා කියලා,කොහෙද?)

ඉතින් මට කියන්නේ,මොකද මං නැට්‍ටුක්කාරයෙක් කියලාද මේකි හිතාන ඉන්නේ?

නෑ.වත්සලාට ඕන කරලා තියෙන්නේ ඒකට බැලේ සංගීතයක් මං ලව්වා අන්තර්ජංජාලයෙන් හොයා ගන්න.කෙල්ලට එච්චර ඔය කෙහෙල්මල් තේරෙන්නේ නෑ, ඒහින්දා මට කිව්වා.ලංකාවේ ග්‍රාමීය හා නාගරික අධ්‍යාපනයේ බෙදීම් නිසා මේ වගේ දෙයකට මගේ උදව් ඉල්ලන එක මං එච්චර හෙළාදකින්නේ නෑ,අනික මොක වුනත් මේ වගේ ඉටිකිරිස් කෙල්ලෙක් උදව් ඉල්ලුවම මොන කොල්ලද නොකරන්නේ.

අනික පාර ඇහුවම මෝඩයා වගේ Google maps බලන්න කියන්නේ නෑ මං තුමා.දන්නවනම් එක්කගෙන ගිහිල්ලම පාර පෙන්නනවා මිසක් ෆෝන් එකේ වැඩ දාන්න ඕන නෑනේ.මොකද කෙල්ල පාර ඇහුවේ අපෙන් මිසක් ෆෝන් එකෙන් නෙවේනේ.

ඔන්න ඉතින් මාත් අන්තර්ජංජාලය පුරා අරහෙන් මෙහෙන් හොයලා ‍තෝර ගත්තා අර ඉස්කෝලෙ පොඩි ලමයින්ට හොඳ බැලේ සංගීතයන්, නාට්‍ය අරව මෙව්වා.

ඔන්න ඉතින් මං ඒක පෑනක දාගෙන අර ගෑනුලමයා ඉන්න බෝඩිමට හවසක ගිහින් ඒ ගෙදර පරිගණකයට දාලා දුන්නා.(මතක තියා ගන්න,මං ඒ කෙල්ලගේ කාමරේට එහෙම නෙවෙයි ගියේ,ඔන්න)

මං මුලින්ම බැලේ ඔපෙරාවක වීඩියෝවක් පෙන්නුවා.කෙල්ල ඉන්නවා හරියට පිටසක්වල ජීවියෙක් දිහා බලා ඉන්නවා වගේ.”අය්යෝ ඔය මොකක්ද,ඕවාද බැලේ කියන්නේ?”

“ඔව් නංගී, මේ අර එංගලන්තේ බැලේ වෙනුවෙන්ම පිහි‍ටුවලා තියෙන ඇකඩමියක ලමයි තමයි මේ රඟ පාන්නේ.බැලේ කියන්නේ අපේ රටේ දේශීය නර්තන කලාවට වඩා හාත්පසින්ම වෙනස් දෙයක්නේ.අපි දේශීය නර්තනයේදී පාදයේ පතුල මුළුමනින්ම පොළොව මත තියනවා.ඒත් බැලේ වලදි පොළොව මත ඇඟිලි තුඩු විතරක් තියලා අවකාශය මත රංගනයක් තමයි යන්නේ.එතනදි තමන් නිදහස් අවකාශයට තමයි තමන්ගේ නර්තන වින්‍යාසයන් විහිදී යන්නේ”මාත් ඉතින් මගේ දැනුම පෙන්නුවා.

ඒ වුනාට අපේ ඉස්කෝලේ බැලේ කියලා කළේ ඔය වගේ එකක් නෙවෙයිනේ.

මොකක්ද _____________,(මං අර ජනප්‍රිය ඉස්කෝලේ නම කිව්වා)

නෑ,මං ඉගෙනගත්ත එක,___________(ඒ කෙල්ල ඉගෙන ගත්ත ඉස්කෝලේ නම කිව්වා ඒකත් නම විතරයි,මං ඒ ඉස්කෝලේ නම ඇහුවෙත් එදාමයි)

 

ආ කාරි නෑ,මොනාද ගත්ත සංගීත කියන්න”

මාත් ඉතින් දාලා පෙන්නුවා අර සම්භාවනීය සංගීත රිද්ම කීපයක්.

ආපෝ,ඔය අර හවසට යන චූං පාං ලොරියේ සංගීතෙනෙ.

මොකා,

මෙය නම් අලුත් සොයාගැනීමකි.යුරෝපයේ 18 සියවසේ නිර්මාණය වූ සංගීත රිද්මයන් චුං පාං ලොරිවල රියදුරන් විසින් සොයාගත් එකක් බව මා දැන ගත්තේ එදාය.

ඔන්න එහෙමයි කතාව.අන්තිමට මං මෙන්න මේ සොයාගැනීම කිපයද වත්සලා එක්ක කතා කරලා දැන ගත්තා.

“චිත්‍රසේන යනු චිත්‍ර ශිල්පියෙකි(ඒකත් ශුවර් නැල්ලු)

ප්‍රේමසිරි කේමදාස යනු ප්‍රේමදාස ජනපතිගේ නෑයෙක් විය හැක.

ඇනා පැව්ලෝවා යනු ලංකාවේ ඉන්නා රුසියානු කෙල්ලෙක් විය හැක.

බැලේ නටන්නේ ඔලුව නැටවීමෙනි.

යකෝ වඳින්න ගිය දේවාලේ ඉහේ කඩා වැටිච්ච එකාට වඩා බයිට් එකක්නේ මට සෙට් වුනේ.

මේ කෙල්ල බැලේ ගැන මෙලෝ මලදානයක් නොදැන ටවුමක ඉස්කෝලෙක පොඩි එවුන්ව බැලේ නටවන්න හදනවා.

මටත් තිබුනේ අර බස්වල දාගෙන ඉන්න පජාත් ඉංග්‍රීසි සින්දු ටිකක් හොයලා දෙන්න,කෙළවෙලා යන්න කියලා.

කොහොමහරි වත්සලා ඒ ඉස්කෝලේ බැලේ කොහොමවෙතත් ඒ වගේ එකක් නැටෙව්වා කියලා නම් පස්සේ ආරංචියක් ආවා.ඒකෙන් පස්සේ කෙල්ල මට මූණ දෙන්නේ නෑ.බැලේ ශිල්පියෙක් වලෙන් නැගිටලා ආවවත්ද?

මේක අහපු තව යුවතියක් මට කිව්වේ “තමන්ට ගැලපෙන අය ආශ්‍රය කරන්න කියන්නේ ඒකනේ”කියලා.බලන් ගියාම ඒකත් ඇත්ත අප්පා.1 වසරේ ප්‍රශ්නයට 13 වසරේ උත්තර දෙන්න ඕන නෑනේ.

Advertisements

හිටියොත් දෙකට නැවී…kick your self

ප්‍රශ්න.මේ ලෝකේ ප්‍රශ්න නැත්තේ කාටද?ඒත් ඇත්තටම ප්‍රශ්නයක් කියන්නේ මොකක්ද?සාමාන්‍ය විග්‍රහය අනුව ගත්තොත් අපි යමක් ගැන අපේක්ෂා කරන මට්ටමයි,සත්‍ය මට්ටමයි අතර වෙනසක් තියෙනවා නැත්නම් වෙනසක් තියෙනවා කියලා අපි හිතුවම ඒක අපි දන්න විදිහට නරකයි කියන එක ප්‍රශ්නයක් කියලා කියන්න පුළුවන්.ඒත් ඇත්තටම ප්‍රශ්නයක් කියන්නේ මොකක්ද කියන එකට තව අයට වෙන වෙන නිර්වචන තියෙනවා වෙන්න පුලුවන්.කොහොමහරි ප්‍රශ්නය ඇතුලේ අපිට අපේක්ෂා පරතරය කියන එකක් තියෙනවා.අපි යමක් සැලසුම් කරලා ඒක ඒ විදිහටම සිද්ධ නොවුනම අපිට ගැටලුවක්.නමුත් ගැටලු ආවම අපි දන්නවා කොහේ හරි මොකක් හරි වැ‍රැද්දක් වෙලා තියෙනවා කියලා.

Image

එතකොට එක්කෝ වැ‍රැද්ද නිවැ‍රැදි කරන්න නැත්නම් වැ‍රැද්දට අදාළ යැයි හිතන කෙනා හොයලා එයාට බැටේ දෙන්න පියවර ගන්නත් පුලුවන්.

ගොඩක් වෙලාවට වෙන්නේ දෙවැනි එක.තේරෙන සිංහලෙන් කිව්වොත් කොන් හොයන එක.රාජ්‍ය ආයතනයක වුනත් පුද්ගලික ආයතනයක වුනත් ඔයා වැඩ කරද්දි දැකලා ඇති මොකක් හරි වැ‍රැද්දක් වෙච්ච ගමන් හොයන්නේ ඒ වැ‍රැද්ද නිවැ‍රැදි කරනවට වඩා ඒකට අහුකරන්න පුලුවන් කෙනෙක් හොයලා දඬුවම් දෙන එක.

අර බල්ලා කුස්සියේ වළ‍ඳෙන් හොස්ස දාලා කන එකට කරන්න පුළුවන් දේවල් අතරින් බල්ලා කාගේද වළඳ කාගෙද කියන එක මත ගන්න පියවර තීරණය වෙනවනේ.

බල්ලා තමන්ගේ නම් කරන්නේ වළඳ බිඳින එක.වළඳ තමන්ගේ නම් කරන්නේ බල්ලට ගහන එක.ඒත් වළ‍ඳෙන් බල්ලට කන්න බැරි වෙන්න වළඳ පැත්තකින් අරං තියන්න හරි බල්ලට එන්න බැරි වෙන්න දොර වහලා තියන එක හරි මේ එක ලොක්කෙකුටවත් තේරෙන්නේ නෑ.එහෙම නැත්නම් කවුරුහරි ඇවිල්ලා මේක විසඳලා දෙන්න කියලා උඩ බලාගෙන ඉන්නවා.

අද මේ වැඩේ ලංකාවේ හරි ජනප්‍රිය වැඩක් වෙලා.ඒ තමයි ප්‍රශ්නයක් වුනාම උඩින් එන බලවේගයකින් මේක විසඳලා දෙන්න ඕන කියන එක.සමහරවිට ඒක අදෘශ්‍යමාන බලවේගයක්.තමන්ට අද්භූත බලයකින් කරවගන්න ඕන කියලා හිතෙන ඒ කියන්නේ හොඳටම පායන කාලෙක වස්සන්න වගේ තමන්ගේ සිතීමේ සීමවාකින් ඔබ්බේ තියෙන දෙයක් සම්බන්ධයෙන් නම් කමක් නෑ කියමු.

ඒත් තමන්ගේ හැම වැඩකටම “”රජයේ මැදිහත්වීමක් “” ඕනේ කියන එක.ඒක මොන වගේ දෙයක්ද?

සත පහක් නොවටිනා කලා නිර්මාණ කරන පුද්ගලයට ඒ වෙනුවෙන් යමක් කරන්න බෑ කියලා ඔහු ඉල්ලනවා මේක රාජ්‍ය මැදිහත්වීමක්.ඇත්තටම තමන්ගේ හිපා‍ටු කමට රටක රාජ්‍යය පලිද?

තමන්ගේ හිපා‍ටු කලා නිර්මාණය කියලා කියන එක විකුණ ගන්න එක තමන්ගේ වගකීමක් කියලා මේ මිනිස්සුන්ට නොතේරෙන්නේ ඇයි?

හේතුව වැරදි පූර්වාදර්ශය.වැ‍රැද්දක් වෙනවට වඩා දරුණුම දේ වෙන්නේ වැරදි පූර්වාදර්ශයක් දෙන එක.ලංකාවේ මිනිස්සු හිතන් ඉන්නවා තමන්ට කොහෙන් හෝ අයුතු ප්‍රතිලාභයක් ලැබිය යුතුයි කියලා.

හේතුව තමන් තමන් හින්දා.

තමන් දේශපාලුවෙක් වෙන එක මේ රටේ නීතිය බල්ලට දාලා වැඩකරන්න තමන්ට ලැබෙන ලයිසන් එකක් කියලා හිතන මිනිස්සු ඉන්නවා.තමන් කලාකරුවෙක්,මාධ්‍යවේදියෙක් වෙන එක මාර්ග නීති කඩ කරලා තමන් අහවල් කෙනා කියලා නීතියෙන් ලිස්සලා යන්න හේතුවක් කරගෙන,ඒ වගේම ඒක ප්‍රසිද්ධ මාධ්‍යයේ කියන තරමට තුච්ච වෙලා.

ලංකාවේ යුද්ධේ තියෙන දවස් වල තමන්ට මාර්ග පරීක්ෂාවක තරමක වෙලාවක් ඉන්න වුනා කියලා ඩෝං ගිය එක්තරා ලොක්කෙක් ඒක කොච්චර අසාධාරණද කියලා පේන විදිහට (හැබැයි තමන්ගේ දෘෂ්ටි කෝණයෙන් විතරයි) නිර්මාණයක් කරලා තමන්ගේ තියෙන සබඳතා මඟින් රාජ්‍ය නාලිකාවකම පෙන්නුවා.ඒත් මේ බක්කට නොතේරුනු දේ තමයි එතකොට මේ වැඩේ හින්දා ලංකාවේ අනික් මිනිස්සු කොච්චර දුක්  වින්දද කියන එක.

මිනිහා කියන විදිහට එක එක්කෙනා එයාලගේ වාහන වල තියෙන ලකුණු බල බලා පාරේ ඕන ඕන විදිහට යන්න දුන්නොත් මොකක් වෙයිද?ඒක එයාලට කමක් නෑනේ.මොකද තමන්ගේ වැඩේ වෙනවනම් අනික් මිනිහා මළත් කමක් නෑ,මොකද තමන් හෙන බක්කෙක්නේ.

ම මුහුණ දීපු එක්තරා අත්දැකීමක් කියනවානම් දවසක් ලංකාවේ එක්තරා නම ගිය හාස්‍ය ශිල්පියකු මට හම්බවුනා එක්තරා අධ්‍යාපන ආයතනයකදි.එයාලා ඒකට ඇවිල්ලා තිබුනේ වැඩසටහනක් කරන්න.මේ කෙනා ඇවිල්ලා හඳුන ගන්න පුලුවන් ලේසිම ක්‍රමය තමයි එයාගේ ඔලුව.

මෙයාව එතන හිටපු සමහර අය ආ අර මේ අර නළුවනේ කියලා හොඳට පුම්බලා තිබුනා.එයා ඒ අර තමන්ව ලොකු කලාකරුවෙක් කියලා හඳුනගත්ත අයට හොඳට gas පෙන්නලා තිබුනා.ඔහු එතනින් යද්දි වුනත් හරියට ජනාධිපති යනවා වගේ තමයි ගියේ.

මොහුගේ රංගනය ගැන මට යම් පැහැදීමක් තිබුනත් මෙයා මට මහා පෞරුෂයක් වුනේ නෑ.ඒ හින්දා මූණටම හම්බු වෙච්ච මෙයාව මං සාමාන්‍ය කෙනෙකුට වඩා ගණන් ගත්තේ නෑ.ඒකට මෙයාට අවුල් ගියා.(සමහර විට මෙයා මට වඩා ගොඩක් මිටි හින්දාද දන්නේ දන්නේ නෑ,මොකද මං මෙයා දිහා බලනවා නම් බලන්න වුනේ ඔලුව පහලට නවලා,එතකොට මට පේන්නේ මෙයාගේ දිලිසෙන තට්ටය)

මං මහා ලොකු චරිතයක් නෙවෙයි,ඒත් මං මහා ලොකු චරිතයක් නොවෙච්ච පලියට මං එයාව දැක්කම හරියට ජනාධිපති දැක්කා වගේ වැඳ වැටෙන්න ඕන නෑනේ.ටික වෙලාවක් යද්දි මිනිහගේ ‍රැස් ටික ටික බැස්සා.ඒකන් මං තේරුම් ගත්ත එක දෙයක් තිබ්බා.අපි තමයි මේ සොකඩයින්ව පොරවල් කරන්නේ.

තමන්ව නැත්නම් තමන්ගේ ලමයව රූපවාහිනියේ ලොකුවට රටටම පෙන්න ගන්න එක තමයි ලොකුම වැඩේ කියලා හිතන් ඉන්න ලංකාවේ මිනිස්සු, මාධ්‍ය සොකඩයින්ව,කලා හෙංචයියන්ව පොරවල් කරනවා.ඉතින් එතකොට උන් අපිට තියලා අරින එක අහන්නත් දෙයක්ද?

කවුරු හරි මේ වගේ සොකඩයෙක්ව වැඩසටහනකට ආපු ගමන් ගන්නවා කෝල් එකක් කියනවා අනේ මං මේ ඔයාට සුභ පතන්න ගත්තේ කියලා.යකෝ රුපියල් 100 දැම්මම ඒකෙනුත් 25 බදු ගහන් රටේ, අපේ සුභ පැතුමෙන් තමා මේ සොකඩ සංවේදී කලාකරුවා ජීවත් වෙන්නේ???????????

වාචාලයා වගේ දොඩවන එකාට කියනවා අනේ ඔයා හරි ලස්සනට program  එක කරනවා කියලා.(කණ්නාඩිය ඉස්සරහට ගිහිල්ලා ඒකේ ඉන්න ඩයිනෝසරයට කියහංකෝ ඒක,සල්ලි වියදම් කරං ඒක ඌට කියන්න යන්නේ.මොකද ඒක හොයන්නේ ඒ ආයතනයේ නිලධාරීන් ඉන්නවා)

හිස් බැලුමක් අපි උඩ යවන්න යවන්න ඒකට අපිව පේන්න ගන්නේ පුංචියට.එතකොට අපි කොච්චර කෑගැහුවත් අපිව ඒකට ඇහෙන්නේ නෑ.සොකඩයින්ව උඩ දාන්න දාන්න වෙන්නෙත් අන්න ඒක.

ඒත් අන්තිමට අප විසින් උඩදාපු හිස් බැලුම්, අපිටම කෙළින්න ගන්නවා.පුදුමේ කියන්නේ ඒකවත් මිනිස්සුන්ට තේරෙන්නේ නැති එක.

කේන්දර පලිය why marriages break? failure of astrology?

සුනිල් පෙරේරා කියලා කියන්නේ ලංකාවේ අතිශය විවාදාත්මක චරිතයක්.එයාට වැඩිය ලොකු කලාකාරයො කොච්චර ලංකාවේ හිටියත් තමන් කියන කරන බොහොම පොඩි දෙයකින් ලොකු සමාජ කැළඹීමක් කරන්න පුලුවන් කෙනෙක්.එයාගේ අතිශය ප්‍රසිද්ධ ගීතයක් තමයි “” I don”t know why හෙවත් එහෙම වෙන්නේ ඇයි කියන ගීතය.මේකෙන් ලංකාවේ අපි හැමෝම දන්න,එහෙම නැත්නම් දන්න ඒත් පවත්නා සමාජ සම්මතය ඇතුලෙදි අපි ප්‍රශ්න නොකරන සිද්ධීන් ගණනාවක් මෙයා වේදිකාවක කෑගහලා අහනවා.

දේශපාලකයො සින්දු කියන,සින්දු කියන අය රඟපාන,රඟපාන අය වලත්තකම් කරන,වලත්තකම් කරන උන්ට උපාධි දෙන,ඒ උපාධි ගන්න මහ ආචාරිලා හිච්චි කෙල්ලො එක්ක බුදියගන්න තරමට දැකුම් දෙන රටේ මේ කොහෙවත් ඉන්න බයිලා කාරයෙක් විදිහට ලංකාවේ ප්‍රබුද්ධ සංගීතය තුල සලකන,විදග්ධ සංගීතය තුල රස්තියාදුකාරයෙක් වෙන මේ සුනිල් පෙරේරා ලංකාවේ අද පවතින සම්මතය ප්‍රශ්න කරලා ගිනි කූරක් ගහපු ගමන් ලංකාවෙ ඉන්න හනුමන්ලා ටික තම තමන්ගේ වලිග පුච්චගෙන ගිනි සිසිල කරන්න ගන්නවා.

ඉතින් අන්තිමට ලංකාව තුල සුනිල් පෙරේරා දේශපාලකයෙකුට වඩා දේශපාලකයෙක් වෙනවා.එයාගේ භාවිතය හින්දා.

කොහොමහරි අද මං කියන්න යන්නේ මේ සුනිල් පෙරේරාගේ අර I don’t know why ගීතයේ එන එක් ප්‍රශ්නයක් ගැන.ඒ තමයි ඔහු මේ ගීතයේ අහන ජෝතිශ්‍ය ප්‍රශ්නය.

හොයලා බලලා කරන මඟුල් කැඩිලා යනවා,ඒ වුනාට පැනලා යන මඟුල් හරියනවා,මෙහෙම වෙන්නේ ඇයි?

ඇත්තටම ඒක හරි අපූරු ප්‍රශ්නයක්.මොකද ලංකාවේ අද වෙනකොට පුදුමාකාර ජෝතිෂ්‍ය උන්මාදයක් යන වෙලාවක්.ඕනම රූපවාහිනී නාලිකාවක උදේට යන වැඩසටහන්,විශේෂයෙන්ම අර කාන්තා වැඩසටහන් කියන එව්වයේ එක එක විදිහේ ජෝතිෂ්‍ය වැඩර්ලා ජිල්මාට් පෙන්නනවා.ලෝකේ සාමාන්‍යයෙන් ඕනම දේශපාලකයෙක් මේ වගේ ගුප්ත දේවල් පස්සේ යන එක සාමාන්‍ය දෙයක්.ඒ වුනාට අද හරි පුදුමාකාර විදිහට මේක ඔලුව උඩ තියාගෙන.

මොක වුනත් ඇත්තටම ඇයි මේ මෙච්චර හොයලා බලලා කරන මඟුල් කැඩිලා යන්නේ?තේරෙන සිංහලෙන් ඇහුවොත් ඇයි මේ කේන්දර බලලා කරන මඟුල් කැඩිලා යන්නේ?

සුනිල් පෙරේරා කියන විදිහට ග්‍රහයො නීච වෙලාවත්ද?

ඇත්තටම එක විදිහකට ග්‍රහයා නීච වීමක් තමයි.

වෙන මොන ග්‍රහයෙක්වත් නෙවෙයි අනවශ්‍ය විදිහට කේන්දර ඔලුව උඩ තියාගත්ත ඒත් මේ ගැන විවෘත මනසකින් බලන්න බැරි මිනිස්සුන්ගේ හිත් නීච වීම තමයි හේතුව.

ලංකාවේ ගොඩක් අය හිතනවා කේන්දර දෙකක් ගලපනවා කියන්නේ ඒ කේන්දර දෙක අරං ඒවයේ අර පොරොන්දම් 20 එහාට මෙහාට දාලා ප්‍රතිශතයක් විදිහට ගලපන එක කියලා.ඒ කියන්නේ පොරොන්දම් 20න් 15ක් ගැලපෙනවා නම් 75% ගැලපෙනවා කියලා සමහර අති පණ්ඩිතයො හිතනවා.

වැදගත්ම දේ,කේන්දර දෙකක් ගලපනවා කියන්නේ පොරොන්දම් ගලපන එක විතරක් නෙවෙයි.ඔයාට පංචාග ලිතක් අරගෙන ඒක කියවන්න තරම් අකුරු ඉගෙනගෙන තියෙනවානම්,මූලික ගණිත කර්ම සාමාන්‍ය තරමකින් දන්නවා නම්ඔයාට පොරොන්දම් බලන්න පුලුවන්.අනික ඒ වගේම අද ඔයාලට අන්තර්ජාලයෙන් නොමිලෙම පොරොන්දම් ගලපලා ගන්න පුලුවන්.ප්‍රධානම දේ පොරොන්දම් 100% ගැලපුනත් ඒ කේන්දර දෙක කසාද බඳින්න ගැලපෙන්න බැරි වෙන්න පුලුවන්.ඒ හින්දා කවදාවත් පොරොන්දම් ගැලපිච්ච පලියට ඒ දෙන්නා හරියට ගැලපෙනවා කියලා කියන්න එපා.

දෙවන කාරණය.කේන්දර දෙකක් ගලපනවා නම් ඒ දෙකේ ග්‍රහ පිහිටීම් අමතක කරන්න එපා.මොකද තේරෙන සිංහලෙන් කියනවානම් දෙන්නෙක් එකට ජීවත් වෙද්දි මුහුන දෙන තත්ත්වයන් පොරොන්දම් වලටත් එහා ගිය විදිහට පෙන්නලා දෙන සටහන තමයි  ඒ දෙන්නගේ කේන්දර සටහන.ඒ ගැන මහා විග්‍රහයක් කරන්න ගියොත් මේක ලියන මටවත් නොතේරෙන මට්ටමට එන හින්දා සරල උදාහරණයකින් කියන්නම්.

හිතන්න අති ධාවන කාම යෝගයක් තියෙන කෙනෙක්,උපාසකයෙක් වගේ තියෙන කෙනෙක්ව බැන්දොත් වෙන්නේ මොකක්ද?( මේ වගේ ඒවට මං කියන්නේ නම් කසාදයට හොඳයි,වටේ පිටේ අයට ඊටත් වඩා හොඳයි කියලා)

 

ඒත් මේ හැම දේටම එහා ගිය තව දෙයක් තියෙනවා.ඒ තමයි කේන්දරය කියන්නේ ජීවිතය නෙවෙයි කියන එක.නමුත් ඒකට තමන්ට අවශ්‍යනම් මඟපෙන්වීමක් කරගන්න පුලුවන්.

කසාදයකට බාධා එන්න මොනවද ඕන කියලා දැන ගන්න කැමති අය ඉන්නවා නම් unfaithful වගේ චිත්තරපටියක් බලලා අවබෝධ කර ගන්න පුලුවන්.

ඊට පස්සේ එතකොට ඇයි හඳපානේ පැනලා යන මඟුල් හරි යන්නේ?

ඇත්තටම  පැනලා යන මඟුල් හැම එකක්ම හරි යන්නේ නෑ.කැඩිලා යන ඒවත් තියෙනවා.බොරු නම් ඔබ දන්නා හඳුනන නීතිඥවරයෙක් ඉන්නවනම් දික්කසාද නඩු කතා කරන, එයාගෙන්ම අහගන්න පුලුවන්.

හැබැයි මෙන්න මෙහෙම එකකුත් තියෙනවා.ඔය පැනලා යන්නේ හරිම අමාරුවක් තියෙන,ඉවසං ඉන්න බැරි අය කියලා හිතුවොත් ඒ අයගේ කේන්දරවල ගොඩක් වෙලාවට සිකුරු ග්‍රහයා බලවත්ව ඉන්නවා වෙන්න පුලුවන්.ඉතින් සිකුරු ග්‍රහයාගේ අතිශය බලවත් වීමක් තිබුනොත් අඩුම ගානේ ඒ දශාව තුලවත් යම් විදිහකට අනික් නරක බලපෑම් යට වෙන්න පුලුවන්.

ප්‍රධානම දේ, කේන්දර කියන්නේ මිනිස්සුන්ගේ ජීවිතයට බලපාන එක දෙයක් විතරයි.ඔයා ජෝතිෂ්‍ය විශ්වාස කරනවා නම් ඒක ඔයාගේ විශ්වාසය.අපි දැන ගන්න ඕන කේන්දරය දිහා බලලා ඒක එක්ක සටන් කරන්න.ඒත් ලංකාවේ අද ඉන්න (ඉස්සරත් ඉඳලා තියෙනවා වෙන්න පුළුවන්) ජිල්මාට් කාරයෝ ඒදේ මිනිස්සුන්ට හරියට කියනවද??????

(මෙම පෝස්‍ටුව සඳහා තාක්ෂණික කරුණු ගවේෂණයේදී පියසේන රතුවිතාන මහතාගේ “ඔබේ කේන්දරයේ හත” නම් පොත ඉවහල් කරගන්නා ලදී.)

මහා ලී දන්සැල හෙවත් ලොක්කා ‍රැවටූ ජිල්මාට්.great wood corruption

ලොක්කා කියන්නේ කොහොමත් ලොකු කෙනෙක්නේ.ලොක්කාට හැමෝම වගේ බයයි.මකද ලොක්කට බලය තියෙනවා.විධිමත්වම.(සමහරවෙලාවට ලොක්කා ගාව ඉන්න එකා ලොක්කට වඩා ලොකු විදිහට ඉන්නවනේ)

අර කතාවකුත් තියෙන්නේ එක කන්තෝරුවක පියන් කෙනෙක් කිව්වා කියලා

“ලොක්කා ඇති තැන මම බලු කුක්කාය,නැති තැන මහ ‍රැජිනගෙත් මී මුත්තාය”

කියලා.ඉතින් අද දිග ඇරෙන්නෙත් ඒ වගේ කතාවක්.මේකේ ඇත්තම සිද්ධිය දන්න අය අදටත් සමහර පැතිවල ඉන්නවා,ඒ හින්දා පරිස්සමින් නම් ගම් පාවිච්චි කරන්න වෙන්නේ.

ලංකාවේ එක ආයතනයක් තිබුනා.මේක ජහමනයා සතු ආයතනයක්.ඒ හින්දා මේකට නිශ්චිත අයිතිකාරයෙක් නෑ.මේ ආයතනය ඔන්න එයාලගේ ප්‍රධාන ව්‍යාපාරික කටයුත්තට අදාලව පිට රටින් ටෙන්ඩර් දාලා ගෙන්නුවා විශාල දැව කඳන් තොගයක්.නිකං නෙවෙයි අපි අර කෙම්පස් ලී කියන්නේ අන්න එව්වා.

 

ටිකක් එහෙම නෙවෙයි නැවක් පුරෝලා.බර සල්ලියක් වියදම් වුනා මේකට.ඔන්න දැන් ප්‍රසම්පාදනය,අනුමැතිය අරක මේක ඔක්කොම කරලා අර ලී පුරවගත්ත නැව ලංකාවට ආවා කියමුකෝ.ඔන්න එතකොට තමයි මේ අදාල ජහමනයා සතු ආයතනයේ ලොක්කන්ට ගිනි පත්තුවුනේ.ඇයි?

මෙච්චර විසාල දැව තොගයක් මෙයාලා ගෙන්නුවට මෙයාලට මතක් වෙලා තිබුනේ නෑ,යකෝ මේක ගබඩා කරන්නේ කොහේද කියලා.නැවක් පුරවලා ලී ගෙනාවම මෙයාලට එච්චර විසාල ගබඩා තිබ්බේ නෑ.මළ කෙළියයි කියලා කට්ටිය හදිසියට පුද්ගලික ව්‍යාපාරිකයෙක්ගෙන් වැඩි මිලට ගබඩා කුලියට ගත්තා.ඒත් මදි.අනික දැන් මේවා වරායේ තියන් ඉන්නත් බෑ,ගුදම් ගාස්තු වලටත් වඩා වරායෙන් බර බරේ දාන්න ගත්තා මේක මළ වදයක් හින්දා මේ අර දඩාර ලී තොග ගුදම් වල ගොඩ ගහන් ඉන්නවා කියලා.

මොකද වුනේ, කරන්නම දෙයක් නැති තැන ලොක්කො අරගත්තා මාර තීරණයක්.ඒ ගොල්ලෝ කුලියට ලොරි අරගෙන අර ලී තොග අඩුක් කරා නගරයෙන් බැහැර පාරවල් දිගේ.

ලොරිය එනවා ලී ගන්නවා,ගිහින් බානවා.

ඒ බාන තැන් වල කිසිම නිලධාරියෙක් නෑ.අනික බාන්නේ පාරේ හින්දා GRN වෙන්නෙත් නෑ.අන්තිම ප්‍රතිඵලය,ඒ පැත්තේ මිනිස්සු අර ලී ගෙවල් වලට ඇද ගත්තා.පැත්තේ ලී මෝල්කාරයා දුන්නා බාගෙකට විතර වැඩේ,සත 5 ගෙවන් නැතුව.අර ලොරිවලත් එන මිනිස්සු අන්තිමට ලී බාන්නේ නැතිව ඒවත් අරං ගියා ගෙදර.ඇයි යකෝ ලොරි කුලී වගේද අච්චර වටින ලී ගොඩක්,අනික කෙම්පස් ලී.!!!!!

Image

මේ ආයතනේ ඉන්න ලොක්කන්ගේ හා සොක්කන්ගේ මහා ලී දානයෙන් පස්සේ දැන් ඔන්න එයාලා කල්පනා කරනවා මේ පාඩුව වහන්නේ කොහෙන්ද කියලා.මොකද තමන්ගේ තොගය මූදට වීසිකරා වගේනේ.කට්ටිය දුන්නා රජ ජිල් මාට් එකක්.

අවුරුද්ද අන්තිමට ගිණුම් හදද්දි මෙයාලා සම්පූර්ණ තොගය, අර නැතිවෙච්ච එව්වත් එක්කම තියෙන විදිහට දාලා අවසන් තොගය ගිණුම්ගත කරා.(මෙයාලගේ ගිණුම් වර්ෂය දෙසැම්බර් 31 ඉවරයි,අර ලී දානය වුනේ දෙසැම්බර් අන්තිම සතියේ විතර).

 

එතකොට මේ අවුරුද්දේ ලාභය අඩු වෙන්නේ නෑ,මොකද අවසන් තොගය අර මුල් ගාණම පෙන්නනවනේ.ලොක්කෝ කට්ටිය ආ මේ පාර අපේ ආයතනය මෙච්චර ලාභයක් ලබලා කියලා පත්තරවල එහෙම දාලා මහ තැනටත් ගිහිල්ලා පෙන්නුවා.එතුමාටත් ඒක එච්චරම තේරුනේ නෑ.මොකද ඉහලට ඉහලට යන්න යන්න,කට්ටිය බලන්නේ සාරාංශගත දත්තනේ.වෙච්ච සෙල්ලම දන්නේ නෑනේ.

 

එතකොට හානියට මොකද වුනේ?

ඊලඟ අවුරුද්දේ මෙයාලා මුලින්ම ද්විත්ව සටහනක් දැම්මා තොග හානියට.එතකොට මේ අවුරුද්දේ තොග හානිය ඊලඟ අවුරුද්දේ මුලදි වෙච්ච පාඩුවක් විදිහට දාලා ඒ අවුරුද්ද මුල ඉඳන් පාඩුවක් විදිහට අරං ආවා.

අන්තිමට පාඩුව පාඩුවම තමයි,ඒ වුනාට අතීසාරයට අමුඩ ගහන විසඳුම් තමයි මේ ආයතන කොහොමත් දෙන්නේ.ඉතින් අවුරුද්දක් ශේප් කරා මේ ජිල්මාට් එකෙන්.

අනික වෙලාවටම මේ ආයතනය ගැන හොයලා බලන මහ ලොක්කට ගිණුම්කරණය ගැන ලොකු දැනුමක් නෑ.

පරිගණක වෛරසයක් එනෝ,දුවපියෝ,computer virus is coming,beware.

පරිගණක ලෝකයේ ඉන්න අය අහන්න,දකින්න ආසම නැති දෙයක් තමයි පරිගණක වෛරස කියන්නේ.ඒත් අකමැති වුනත් පරිගණක වෛරස තියෙන එක එන එක අපිට වළක්වන්න බෑ.සමහරු විනෝදයට පරිගණක වෛරස හදද්දි තව අය විනාශකාරී දේවල් සඳහාත් මේවා හදනවා.දැන් කාලේ ගොඩක් අය මේවයින් ගැලවෙන්න virus guard දාන එකේ ඉඳන් දෙවියන්ට කියන එක දක්වා එක එක ඒවා කරනවා.ඒත් ඒ මොනවා කළත් ඒ හැම එකකින්ම රිංගන වෛරසුත් නැතුවම නෙවෙයි.

මොකද වෛරස නිෂ්පාදකයා හා ආරක්ෂිත මෙවලම් නිෂ්පාදකයා අතර තියෙන්නේ අර පූසා හා මීයා අතර සම්බන්ධේ වගේ එකක් හින්දා.ඉස්සර වෙච්ච එකා දිනුම්.

මේ කතාව ටිකක් ඉස්සර වෙච්ච වැඩක්.අද කාලේ පරිගණක වෛරස ගැන ගොඩක් අය අඩු ගානේ අහලා හරි තිබුනට මේ කාලේ පරිගණක කියන්නේ අරුම පුදුම පෙට්ටියක්.කොටින්ම කියනවනම් ආයතනයක පරිගණකය හසුරුවන කෙනා ඒ කියන්නේ අර  data entry operator කියලා අද අපි කියන ‍රැකියාව කරන කෙනා මහ බලවතෙක්.

ඒ දවස්වල love bug එහෙම නැත්නම් CHI චර්නොබිල් කියලා පරිගණක වෛරසයක් අප්‍රේල් මාසේ මෙන්න මේ දිනේ ව්‍යාප්ත වෙනවා කියලා ප්‍රවෘත්ති වලට කිව්වා.ඒ කියපු විදිහට ඒ අප්‍රේල් 26ද කවදද මන්දා ඒ වෛරසය ක්‍රියාත්මක වෙනවා.ඒකෙන්  පරිගණක වලට බර හානි වෙනවා කියලා තමා පත්තරවල පවා පළ වුනේ.

Image

businessinsider.com

ඔන්න මං මේ කියන දවසේ ඒ කියන්නේ අප්‍රේල් මාසේ 25 (හෙට පරිගණක වෛරසය  එනවා කියන දවසේ) එක පරිගණක අධ්‍යාපන ආයතනයක අයට ගැටලුවක් මතු වුනා.මොකද ඒ හෙටයි කියන දවස ඒ ආයතනයේ වැඩ ගොඩක් යෙදී තිබුනු දවසක්.වෛරසයට බයේ ආයතනය එදා වහන්න හිතුනත් වැඩ ගොඩ එක්ක එහෙම කරන්නත් බෑ.ඒ වුනාට වෛරසය ඇවිල්ලා ජර මරයක් වුනොත් ඒකත් පාඩුව.ඉතින් ඒ ආයතනයේ ඉන්න පරිගණක උපදේශකවරු කරා පොඩි ජිල්මාට් එකක්.කොහොමත් ලංකාවේ අය කොම්පියුටර් ජිල්මාට් වලට දක්ෂයිලුනේ.අඩු ගානේ එහෙම දෙයක් තියෙනවා කියලා ලෝකයට හොයලා දුන්නේත් අපිමනේ.

මේ කට්ටිය ප්‍රධාන පරිගණකයෙන් ඒ කියන්නේ  server එකෙන් පද්ධති දිනය වෙනස් කරා.ඒ කියන්නේ අද දිනය ඇවිල්ලා අප්‍රේල් 25නේ.අර වෛරසය එන්නේ අප්‍රේල් 26නේ.ඉතින් මෙයාලා දිනය වෙනස් කරා අද දිනය අප්‍රේල් 27 කියලා.එතකොට මුළු පද්ධතියම අද දිනය 27 කියලා හදා ගත්තම හෙට දිනයට පරිගණකය ඇරඹෙන්නේ අප්‍රේල් 28 දායින්.එතකොට වෛරසය ඊයේ,එහෙම තමයි පරිගණකය හිතන්නේ.මොකද මේ වෛරසය හදලා තියෙන්නේ අප්‍රේල් 26 ක්‍රියාතමක වෙන්නනේ.

 ඔන්න ඉතින් ඊළඟ දවසේ කට්ටිය සුපුරුදු ලෙස වැඩට ආවා.මං කිව්වනේ මේ ආයතනය පරිගනක අධ්‍යාපනය ඒ කියන්නේ පරිගනක පන්ති තියන තැනක් කියලා.එදා කිසිම ලමයෙක් පරිගණක පන්තියට ආවේ නෑ.කට්ටියටම හරිම පුදුමයි

කොහොමහරි ඊළඟ දවසේ ලමයි පන්ති ආවම තමයි වැඩේ තේරුනේ.ඒ දවස් වල ලංකාවේ ජනමාධ්‍ය හැම තිස්සේම මෙන්න මෙදා පරිගණක වෛරසයක් එනවා කියලා මොර දුන්නා මිසක් මේක මොකක්ද කියලා කිව්වේ නෑනේ.ඉතින් ගෙවල් වලින් ලමයින්ට කියලා

ඔන්න අද මොකක්ද වෛරසයක් අර කොම්පීටර් පෙට්ටියෙන් එනවා කියලා කියනවා,උඹලා ඔහේ ගිහිල්ලා දන්නැති ලෙඩ හදාගෙන වරෙල්ලකො කියලා,ඒ ලමයින්ව ගෙදර නවත්තගෙන.

ගම්වල මිනිස්සු හිතලා තියෙන්නේ ඒක බෝවෙන ලෙඩක් කියලා.අර කවුද මුදලාලියෙක් එයා ලොකු කමට ගෙදර ගෙනත් තියපු කොම්පීතර් රාජයාට ඇප නූලකුත් බැන්දලු මේකට.

Image

 

ඔන්න දැන් අර අදාල දිනය පහු වුනාට පස්සේ මේ උපදේශකවරු පිරිස ආයිමත් පාරක් පද්ධතිය සුපුරුදු දිනයට ගෙනාවලු.

ඔන්න දැන් ඊළඟ අවුරුද්දත් ආවලු.මේ වසරෙත් අප්‍රේල් 26 අර වෛරසය ක්‍රියාත්මක වෙන්න නියමිතයිලු.ඒ වුනාට මේ පාර කිසිම ජනමාධ්‍යකට මේක මතක් වුනේ නැල්ලු.අර උපදේශකයින්ටත් මතක් වුනේ නැල්ලු,පද්ධතියේ දිනය වෙනස් කරන්න.ඉතින් එයාලා සුපුරුදු විදිහටම් ඇවිල්ලා අප්‍රේල් 26 පරිගනක ක්‍රියාත්මක කළාලු…………………………….

 

අන්න එදායින් පස්සෙලු ඒ ආයතනයේ ලොක්කට පරිගණක වලට virus guard දාන්න මතක් වුනේ.

ඇටේ එක්ක වැඩේ. Jackfruit in Sri Lanka

සුද්දෝ.ලංකාවේ ඉන්න ගොඩක් අය මූලික අන්ත දෙකක ඉන්නවා.මේ අන්ත දෙකම ලංකාව සුද්දට එහෙම නැත්නම් යුරෝපයේ විදේශිකයින්ට යටත් වෙච්ච හින්දා ඇති වෙච්ච ඒවා කිව්වොත් මං හිතන්නේ හරි.තමන් උදේට බොන තේ කෝප්පයේ ඉඳලා රෑට නිදා ගන්න යන ඇඳේ කොට්ටේ දක්වාම මේ අන්ත දෙක ඒ අය පාවිච්චි කරනවා ඒකට අදාල වුනත් නොවුනත්.ඒ තමයි විදේශීය,විශේෂයෙන්ම සුද්දගෙන් එන හැම දෙයක්ම හොඳයි කියන එක.මොකද මොනවා වුනත් සුද්දෝනේ කියලා.

අනික තමයි ඔය පර සුද්දගේ එව්වා අපිට එපා.ඕක විදේශීය කුමන්ත්‍රණයක් කියන එක.එයාලට විදේශීය කිසිම දෙයක් එපා ගානට තමයි ඉන්නේ.මොකද ඒවා සුද්දන්ගේ කියලා.

හැබැයි ඔය මොනවා කිව්වත් අපි පිළි ගන්න ඕන දෙයක් තියෙනවා ඒ තමයි ලෝකේ මිනිස්සු සුදු කලු කියලා බේද කරන්න හොඳ නැති එක.ඒක පැත්තකින් තියලා කතාවට බැස්සොත් අද කියන්න වෙන්නේ ලංකාවට ආපු සුද්දෙකුට වෙච්ච අකරතැබ්බක් ගැන.කොහොමත් ලංකාවට එන සුද්දන්ට එක එක විදිහේ කරදර වෙනවනේ.සමහරු ඕනකමින්ම කරවනවා.ඔන්න දවසක් එක ගමක ඉන්න මනුස්සයෙක්, අපි කියමුකෝ බන්දුල කියලා,(බන්දුල ගුණවර්ධන නෙවේ) එයාගේ වත්තේ වරකා ගහක ඉදුණු වරකා ගෙඩියක් දැක්කා.ඒක හොඳටම ඉදිලා.මිනිහා කොහොමත් වැල,වරකා වෙනස හොඳට අඳුන්න හින්දා මේ වරකා ගෙඩිය කන්න හිතන් බා ගත්තා.

ඔය වරකා කාපු අය දන්නවැති වරකා මදුළු නිකං එකපාරටම කටේ දාගෙන ගිලින්නේ නෑ.ඒකට ගම්මිරිස් ටිකක් හොඳට කුඩු කරලා ඉහලා තමයි කන්න ඕනේ.

Image

thymebombe.com

බන්දුල ඉතින් එහෙමත් කරලා වත්තේ මායිමේ ඉඳන් වරකා කන කොට මේන්න බොලේ යනවා වත්ත අයිනෙන් සුද්දෙක්!

මොකද වත්ත තියෙන්නේ පාර අයිනේ.

බන්දුවට ඉංග්‍රීසී බෑ.සුද්දට සිංහල බෑ.ඒ වුනාට බන්දුවා සුද්දට අඬ ගහලා දුන්නා වරකා මදුළක්.මොකද ලංකාවේ අයගේ ඇ‍ඟේම තියෙන දෙයක්නේ ආගන්තුක සත්කාරය කියන එක.

Image

pedge.com

දෙන්නටම කටින් භාෂාව බැරි හින්දා අතින් පයින් කතා කරලා ඔන්න දැන් සුද්දා වරකා මදුලක් අරං කනවා.(ඒ සුද්දට මීට කලින් ලංකාවේ ඇම්ඩෙක් එහෙම හම්බවෙලා නැතුව ඇති.)

ටික වෙලාවක් යනකොට බන්දුලට ඇහෙනවා ටකස්,බකස්,කරස් කියලා සද්දයක්,සුද්දා වරකා කනකොට.අනික බන්දුවා වරකා කාලා ඇටේ වීසි කරාට සුද්දා එහෙමත්  නෑ.බලද්දි මළ සේක.සුද්දාට වරකා මඩුළු දුන්නට ඇටේ අයින් කරේ නෑනේ.ඉතින් සුද්දත් ඇටේ පිටින් වැඩේ දෙනවා.

 පස්සේ බන්දුවා මිනිහගේ ඉංග්‍රීසී දන්න පුතෙක් ගෙන්නලා සුද්දට හරි විදිහට වරකා කන විදිහ කියලා දුන්නා.සුද්දා එතකොට තමයි වරකාවල නියම රස දැනගත්තේ.

ඒ සුද්දා ඇවිල්ලා ඒ පැත්තේ කාලයක් නතර වෙලා හිටියා.අන්තිමට ඒ සුද්දා යද්දි බන්දුවට මේ වරකා ටින් කරලා රට යවන අදහසකුත් දීලා ගියා.ඒ වුනාට බන්දුවා ප්‍රමුඛ පවුලට ලොකු වුනේ ඒ සුද්දා දීලා  ගිය අරුමෝසම් බඩු වගයක්.

බන්දුවා නම් සාමාන්‍ය විදිහට තාමත් එතන.ඒත් පස්සේ කාලෙක ලංකාවට ආපු සුද්දා වෙනත් රටකින් ආපු ඔය වගේ රස මසවුලක් ටින් කරලා ලංකාවේ අයටම විකුණන ව්‍යාපාරයක් හදලා ගියා.

අවුරුද්දට රජ හොද්දක්.අතිශයින්ම පිරිමින්ටයි.greatest gruel of the world.:-)

ඔය එක එක රස කෑම හදන්න ගෑනු කට්ටිය කියලනේ කියන්නේ.ඒ වුනාට එයාලට වැඩිය රසට උයන්න පුලුවන් පිරිමි අය නැතුවාම නෙවෙයි.අද දාන්න යන්නේ පිරිමි අයට සුවිශේෂි හොද්දක් ගැන.මේක ගෑනු අයටත් හදන්න පුලුවන්.ඒ වුනාට එයාලාව මේකෙන් ඈත් කරලා තියන එක ඇඟට ගුණයි.ඒ මොකද කියලා හොද්ද හදන හැටි කියන් යද්දි තේරෙයි.මේ හොද්දේ නම තමයි “””රජ හොද්ද””.පුදපු ගමන් කාපි යකා ක්‍රමයට දාන්නේ නැතිව හොද්ද හොයා ගන්න හේතු භූත වෙච්ච කතාවත් කියමින්ම වට්ටෝරුව කියන්නම්.

Image

ඔන්න පහුගිය දවස් වල තිබුනනේ දිග නිවාඩුවක්.ඒකට අපි කට්ටියක් එක්කම සෙට් වෙලා මංගැච්චුවා එක්තරා හද්ද ඩොටයක.මොකද කාලයක් තිස්සේ යන්න හද හද හිටියට අන්තිමට ඔක්කෝටම එකඟ වෙන්න පුලුවන් වෙන්න පුලුවන් වුනේ තැන් කීපයකට විතරක් හින්දා.

දැං ඔන්න ඔය කියන පැත්තට ගියා කියමුකෝ.ප්‍රශ්නය වුනේ මේ තැනට ගියාම අපිටම උයාගෙන තමයි කන්න වෙන්නේ.මොකද ඒ පැත්ත පලාතක කෑම ගන්න කඩයක් නෑ.කලින්ම දැනං හිටපු හින්දා අපි ඉතින් අඩුම කුඩුමත් අරගෙන තමයි මංගැච්චුවේ.

ඔන්න ඉතින් කට්ටිය බෙදිලා එක එක කට්ටිය එක එක ව්‍යංජන හදන්න ගත්තා.අපිට සෙට් වුනේ සැමන් වලින් කරියක් හදන්න.අපිත් ඉතින් ඒක පැනලා ගත්තා.මොකද ලොකු වැඩක් නැතිව ඇති කියලා.ඉතින් ඒ අත්දැකීම් වලින් තමයි මේ නියම හොද්දක් හදන උපදෙස දෙන්නේ,හොඳේ.

මුලින්ම සැමන් ටිං එක කඩලා ඒක දාගන්න ඕන බේසමකට.ඊට පස්සේ ඔය පස් වැනි සිල් පදේ කඩපු එකාලා ඉන්නවනම් එතනින් එලවන්න ඕන.නැත්නම් සැමන් ටික වාෂ්ප වෙනවා.ඊළඟට හොඳට හයි හත්තිය තියෙන හතර පස් දෙනෙක් එකතු වෙලා අර සැමන් කුට්ටි හොඳට චප්ප කරලා ගන්න ඕන.හරියට ක්ලේමෝ එකකට අහු වෙච්ච මාලුවා වගේ වෙන්න.

හොද්ද හදද්දි පොල් මිරිකන්න දෙන්න ඕන හරියට අර ගජබා රජතුමා එක්ක ඉන්දියාවට ගිය නීල මහා යෝධයා වගේ ඩයල් එකකට.මොකද නීල මහා යෝධයා වැලි මිරිකා තෙල් ගත්තා කියනවනේ.ඉතින් ඒ ක්‍රමයට තමයි පොල් මිරිකා කිරි ගන්න ඕන.

Image

drawsigner.com

ඒ කිරි ටික සාස්පානකට දාලා අර සැමන් අංශුටිකත් දාලා තව ඔය අතට අහුවෙන රම්පේ,කරපිංචා,සුදු ළූනු,රතු ළූනු,බී ළූනු,ලොකු ළූනු..ඔය ඕන ළූනු ජාතියක්,එතකොට මිරිස් ,ලුණු,ගම්මිරිස් හැම දේම දාන්න ඕන.ඊට පස්සේ අර දිග මිට තියෙන කුඩයක් අරගෙන හොඳට අර හොද්ද හැඳි ගන්න ඕන.ඒකට ඔය දොදොල් තාච්චි හැඳි ගාපු අය ඉන්නවනම් සුපිරි.හොද්ද ලිපේ තියලා බුබුළු දාන්න දාන්න කුඩෙන් හොඳට හැඳි ගාන්න ඕන.

ඔය හොද්ද හොඳට ඉදුනා කියලා දැන ගන්නේ සියලුම සමන් කෑලි හොද්දට දිය වුනාම තමයි.ඊට පස්සේ අර හොද්ද නිවෙනකං ඉඳලා රස කාරක එකතු කරන්න ඕන.අපේ එකෙක් නම් දාලා තිබුනේ ගල් කාලක්.ඒකත් හොඳට අර කුඩෙන් මිශ්‍ර කරන්න ඕන.

Image

wallpapersdb.org

අන්තිමටම ඔයාලට ලැබෙනවා නියම රියල් දේශීය හොද්දක්.ආයි හොදි ඕන්නෑ මේ හොද්ද කෑවාම.පාන් එහෙම කන්න මරු.

ඒ වගේම මේ හොද්දත් අතිශයින්ම පිරිමින්ට පමණයි.මොකද මේ හොද්ද කාන්තා පාර්ශවය රස බැලුවොත් පිරිමි අයට හැමදාම කුස්සියට වෙලා තමයි ඉන්න වෙන්නේ.හොඳේ.

 

අනික මේ හොද්ද හදන්න ගිහින් හරි,කාලා හරි වෙන අතුරු ආන්තරා වලට මං වගකියන්නේ නෑ ඕං.

ගණිකාවට ගණිකාවක් ඉරිසියා කරයි.18+Should prostitution be legalized?

ගණිකාව,වරංගනාව,අබිසාරිකාව,රෑ සමනළිය,නගර ශෝබිනිය…මේ හැම වචනයකින්ම පැහැදිලි වෙන්නේ ලෝකේ පරණම වෘත්තිය කරන කාන්තාවන්ව.මේ ලිපිය කියවන්න කියලා පිවිසෙන ඕනම කෙනෙකුට මුලින්ම පුංචි අවවාදයක් දීලම පටන් ගන්න මං කැමතියි.ඒ තමයි මේක පොඩි ලමයින්ට ඒ කියන්නේ හිතින් පොඩි ලමයින්ටත් (ඔය වගේ දේවල් ඇහුවාම බඩ කුරුවල් වෙන අය) අවශ්‍ය දෙයක් නොවේ කියන එක.ඒ නිසා මේක කෙළින්ම 18+.

විවිධ අයට මේ කාන්තාවන් ගැන විවිධ අදහස් තියෙනවා.ගණිකා වෘත්තිය නීති ගත කරන්න ඕන.මේ ඒ ගැන එක් ප්‍රධාන මතයක්.ඒ වුනාට ගණිකා වෘත්තිය නීති ගත කරනවට විරුද්ධව ගණිකාවොම විරෝධතා පෑවොත් මොකකින් මොකක් වෙයිද?

 ලෝක ඉතිහාසය පිරික්සා බලද්දි අපිට පේන එක දෙයක් තමයි කොපමණ වීරයෝ හිටියත් ඒ වීරයෝ බොහෝ දෙනෙක් තමන්ගේ වීර ක්‍රියා,යුධ ජයග්‍රහණ,මන්දිර,රාජධානි,අභිමානය,මේ ඕනම දෙයක් කාන්තාවක් අභියස දූවිලි ගාණට දාලා තියෙනවා කියන එක.ඒක එයාලා කළාටත් වඩා තමන්ගේ අභිමානය විසින් කරන්න බල කලා.ඒ වීරයෝ දිනාගත් සියල්ල මිල මිල වුනේ ගැහැණියක් සතු ප්‍රධානම හා ප්‍රබලතම ශක්තිය වෙත.ඒ නිසාම කාන්තාවකට තමන්ගේ පහස කියන එක කොච්චර හොඳට අලෙවි කරන්න පුළුවන්ද කියන එක මත රාජධානී වල ඉරණම තීරනය කරන්න පුලුවන් වුනා.ඉතින් ගණිකා වෘත්තිය ලෝකේ පරණම රස්සාව වෙන එක අහන්නත් දෙයක්ද?

ඒත් එහෙම ගණිකා වෘත්තියේ යෙදෙන එක සැලකුණේ අසම්මත දෙයක් විදිහට.අපි සමහර සමාජ වල දකිනවා රජවරුන්ට අන්තංපුර තිබුනා කියලා.ඒ වුනාට ඒ තරමටම අපි අහලා තියෙනවද ‍රැජිනියන්ට පිරිමි අන්තංපුර තිබුනා කියලා?රජකෙනෙක් තමන්ට හිතෙන හිතෙන යුවතිය එක්ක යහන් ගත වීම ඓතිහාසිකවූත් වැදගත්වූත් සම්මතයක් ලෙස දකින සදාචාරවාදීන්,යම් කිසි ‍රැජිනියක්,පාලිකාවක්,දේශපාලනඥවරියක් පිරිමි කිහිප දෙනෙකු එක්ක ලිංගික සබඳතා තියන් ඉන්නවා කියන එක මහා පාපයක් ලෙස දකිනවා.ඇයි ඒ?

ඒකට හේතුව තමයි සම්ප්‍රදායික මතය තුල ඉන්න පුරුෂෝත්තම වෙච්ච ලිංගික අසහනය.කෙල්ලෝ දාහක් එක්ක නිදි වැදුන එකත් හොයන්නේ විවාහයට කන්‍යාවක්.

Image

දැන් තමයි නියම හරිය.ගණිකා වෘත්තිය සමාජයකට අවශ්‍යද?ඔව්.ඇත්තටම අවශ්‍යයි.අනිවාර්යයි.ඒක ලෞකික සමාජයක් නම් ගණිකා වෘත්තිය අත්‍යවශ්‍යයි.දැන් මේක කිව්වම ලංකාවේ ඉන්න බඩු වාදී කුහක සදාචාරවාදීන් කලබල වෙන්න ඕන නෑ.හේතුව මෙන්න මේකයි.

මිනිසාගේ මූලික අවශ්‍යතා ආහාර,ඇඳුම්,නිවාස වලින් විතරක් සීමා වෙනවා සම්ප්‍රදායික පාසල් අධ්‍යාපනය තුලදි.ඒත් ප්‍රයෝගික ලෝකය තුල ඒකට සෞඛ්‍ය පහසුකම්,අධ්‍යාපනය,නිදහස,ඒ වගේම විනෝදය වගේ ඒවත් එකතු වෙනවා.මෙන්න මෙතනදි තමයි ලිංගිකත්වය කියන දේ මිනිස් අවශ්‍යතාවක් විදිහට කරළියට එන්නේ.ඒක සාමාන්‍ය ඕනම මිනිසෙක්ට පොදුයි.

සම්මත ලෝකය තුල මිනිසා හදාගෙන තියෙනවා විවාහය කියන බැඳීම ඒ ලිංගිකත්වය කියන දේ ලබා ගන්න.ඒත් විවාහය කියන්නේ දීර්ඝ කාලීන බැඳීමක්.

ආබාධිත පුද්ගලයෙක්,ස්ථිර රස්සාවක් නැති මිනිහෙක් විවාහය කියන සම්මතය තුල ඉඳගෙන තමන්ගේ මේ ලිංගිකත්වය කියන දේට යන්නේ කෝමද?

අනික ගොඩක් පිරිමි ගෙදර කොච්චර කොහොම ඉව්වත් වෙන වෙන හෝටල්වලිනුත් කන්න හොරෙන් හරි යනවනේ.ඉතින් මේ ප්‍රායෝගික තත්ත්වය එක්ක සමාජයකට ගණිකා වෘත්තිය ඕන වෙනවා.මොකද නැත්නම් මේ වෙන වෙන හෝටල්වලින් කන්න යන කට්ටිය හොරා කන්න ගන්නවා.බලෙන් කන්න ගන්නවා.

Image

socialpolis.net

හැබැයි මෙන්න මෙතනදි තමයි හරි ලස්සන වැඩේ වෙන්නේ.සාමාන්‍යයෙන් ගහක ගෙඩි කොච්චර තිබුනත් මිනිස්සු යන්නේ තහනම් ගෙඩි කන්නනේ.එතකොට ගණිකාව කියන දේ සමාජයේ තහනම්,නැත්නම් අසම්මත දෙයක් වෙලා තියෙනවට මිනිස්සු හරි කැමතියි.මොකද එතකොට තමයි තමන් හොරෙන් ගන්න දෙයක් විදිහට වින්දනය කරන්නේ.මේක එලිපිට තිබ්බම සාමාන්‍ය දෙයක් වෙනවා.එතකොට තමන් හොරෙන් කළා කියන වින්දනය අර කුහක සදාචාරවාදීන්ට අහිමි වෙනවා.

එතකොට ගණිකා වෘත්තිය නීතිගත වෙනවා කිව්වම ගණිකාවන්ට බය හිතෙන්නේ ඇයි?

ගමේ හරක් හොරා මරතේලිස්, ගමේ දාන සුපිරි වෙළෙඳසැලේ හරක් මස් විකුණනවා කියලා ඒකට විරුද්ධ වෙනවා.

හේතුව මං මුලින් කිව්ව තත්ත්වය නිසා.තමන් සතු ප්‍රධානම ශක්තිය, තමන්ගේ එකම බලය බවට පත් කරගත් කෙනාට, ඒකම නීතිගත කරලා අනික් අයටත් නම්බුකාර විදිහට දෙන්න අවස්ථාව හදලා දුන්නම තමන්ගේ හොට බිම ඇනෙන හින්දා.

Image

එතකොට එයාට තමන්ව අලෙවි කරන්න අමාරු වෙනවා.මොකද කෙලින්ම ඒක දෙන අය නීතිය තුලම ඉන්න නිසා.අනික අසම්මතය තුල මේක කරපු අයට නීතිගත වෙන්න සිදුවෙන හින්දා තමන්ට ඕන මඟුලක් ඕන විදිහට කරගන්න බැරි වෙනවා.නීතියට අනුකූල වෙන්න වෙනවා.

තමන් නීතියට පිටින් ඉඳගෙන අලෙවි කරපු තමන්ගේ ලිංගිකත්වය,විවෘත වෙළෙඳපොලක හුවමාරුවෙන සේවාවක් වෙන්න ගන්නවා.තමන් අනියමින් බලය පාවිච්චි කරා නම් තමන්ගේ ලිංගික සේවා අලෙවිය නීතියට යටින් ඒත් නීතියට හයිරම් දාමින් පවත්වගෙන යන්න,ඒක තවදුරටත් සුම්මා.

කවුරුහරි නීතිය කඩ කරලා පරණ පුරුදු විදිහ කරන්න හැදුවොත් අර නීතියට අනුගත වෙච්ච කෙනා නීතිය කඩ කරලා අසාධාරණ වාසියක් ගන්න කෙනාට විරුද්ධව පියවර ගන්නවා.

Image

recultured.com

තේරෙන සිංහලෙන් කිව්වොත් නීතිගත වෙච්ච ගණිකා නිවාසය,නීතියට පිටින් යන ගණිකාවට යුද්ධ ප්‍රකාශ කරනවා.හරියට ටවුමේ rest house අයිතිකාරයා හොර room දෙන කෙනා එක්ක තරහයි වගේ.

ඉතින් ලංකාවේ ගණිකා වෘත්තිය නීතිගත කරන්න කියලා කවුරුහරි කිව්වම ඒකට එරෙහිව පටෝරියං ගා ගණිකාවක් හෝ ගණිකා සංවිධානයක් පිකට් කළොත් පුදුම වෙන්න එපා.එයට බාප්පලා අනුග්‍රහය දැක්වූවොත් එයටද පුදුම විය යුතු නැත.

අන්තිමට මං මේකත් කියනවා.මේක ගණිකා වෘත්තිය නීතිගත කරන්න ඕනද නැද්ද කියන එක ගැන සංවාදයක් නෙවෙයි.ගණිකා වෘත්තිය නීතිගත කරනවට එරෙහිව ගණිකාවන්ම විරෝධය පෑමට ඇති හැකියාව කියන එකයි කියලා තියෙන්නේ.

ගහන ගැහිල්ල.Shylock today

නිවටයා දැක්කම එලුවත් ‍රැවුල පානවා කියන්නේ අපි අතර තියෙන ආප්තෝපදේශයක්.ඒකේ තේරුම තමයි අවස්ථාව ආපුවාම ඉතාම නොවැදගත් පුද්ගලයා වුනත් අසරණ නැත්නම් පීඩිතයාගෙන් වාඩුව ගන්න හදනවා කියන එක.එතනදි තමන්ට ඒ වින්දිතයාගෙන් විපතක් වුනාද කියන එක අදාළ නෑ.දෙන්න පුලුවන් වෙලාවේ දෙනවා බැෂ්ටිය අතීසාරයට ජාපාල ගැහුවා වගේ වෙන්න.

ලංකාවේ මේ වැඩේ හරි ලස්සනට කරන පිරිස් තමයි නීතීඥවරු,පොලීසිය,එතකොට දේශපාලඥයො.

ඒ හැමෝම තමන් ගාවට උදව්වක් සමහරවෙලාවට ඒක රාජකාරියක්,මුදල් දී ලබා ගන්න  සේවාවක් වුනත් තමන් ගාවට එන මනුස්සයා අසරණ නැත්නම් එච්චර දෙයක් නොතේරෙන කෙනෙක් කියලා තේරුම් ගිය ගමන් ඒ මනුස්සයා හූරගෙන කන්න පටන් ගන්නවා.

අද මං කියන්න යන්නේ වෘත්තීමය විදිහටම මේ වැඩේ ලංකාවේ කොරන උන්දැලා වගයක් ගැන.මෙයාලා මේ වැඩේ කරන්න සියවස් ගණනක් තිස්සේ ප්‍රසිද්ධයි.අනික නීතියෙන්ම මේ වැඩේ කරන්න අවශ්‍ය ප්‍රතිපාදන හදලා දීලා තියෙනවා.

ඒ තමයි බදු නිලධාරීන්.මෙයාලට කවුරු හරි මනුස්සයෙක් අහුවුනා කියන්නේ හිඟන්නට මී වදේ අහුවුනා වගේ තමයි.පැනි ටික බීලා කිරි වදවලටත් වැඩේ සෙට් කරලා අන්තිමට වදේ මිරිකලා මී ඉටිත් ගන්න වැඩ තමයි කරන්නේ.

ඔයාලට මතක ඇති 2002 විතර ලංකාවට අලුත් බද්දක් හඳුන්වාදෙනවා.ඒ තමයි එකතු කළ අගය මත බද්ද.VAT.කලින් තිබ්බ භාන්ඩ හා සේවා බද්ද අහෝසි කරලා තමයි මේක පැනෙව්වේ.මේ බද්ද,VAT සෑහෙන න්‍යයාත්මක පැත්තක් තියෙනවා.බදු පදනම,සාධාරණත්වය පිළිබඳ ප්‍රශ්න අරවා මෙව්වා ගොඩක්.මං එව්වා මෙතන ලියන්න යන්නේ නෑ.

Image

මොකද ඔය බදු නීති කියන්නේ රෑට නින්ද යන්නේම නැත්නම් කියවන්න තියෙන මහා හෑල්ලක්.පොත් ටික අත් උඩ තියාගෙන නින්ද යනවා ෂුවර්.කොහොමහරි කතාවට ආවොත් මේ බද්ද පනවන්න කලින් පාර්ලිමේන්තුවේ විවාදය යන අතරතුර ඇම්ඩන් කඩ හිමියෙක් දුන්නා රජ වැඩක්.

මිනිහා ආ අලුත් බද්දක් ආවා කියලා වහාම මිනිහගේ කඩේ (මට මතක හැටියට බේකරියේ) සියලුම නිෂ්පාදනවල මිල අර බදු ප්‍රතිශතයෙන් ඉහල නැග්ගුවා.

මතක තියාගන්න තවම පාර්ලිමේන්තුවෙන් බද්ද අනුමත වෙලත් නෑ.ඒත් කෑම මිල ඉහල දාලා.අනික මෙයාගේ බේකරිය ලංකාවේ අදටත් ඉහල නාමයක් සහිත ආයතනයක්.ඔන්න දවසක් ඉතින් මේ කඩෙන් ඔය උදේට කන්න බනිස්,මාලු පාන් වගයක් ගන්න එනවා එක පොරක්.

පොර කඩේට එන්නේ නිකං කොට කලිසමක් ඇඳන් හරියට අර සකලබුජං වගේ.ඒ වුනාට ලොකු ගැෂ්ටෙක්.ඔන්න ඉතින් පොර ඇවිල්ලා බඩු ගත්තම කලින් ගත්තට වඩා මිල වැඩි වෙලා.

පොර ඇහුවා ඇයි මේ හදිසියේම ඇයි මිල නැග්ගේ කියලා?

කඩේ ඉන්න අයත් (මේ ඇවිල්ලා අර ගෝලයො කියන කට්ටිය) අයිතිකාරයා කිව්ව විදිහටම කිව්වා ආ අර VAT බද්ද පණවලානේ,ඒ හින්දා මිල නැඟලා කියලා.

පොර කිව්වා “”ආ ඇත්තද මං දන්නේ නෑනේ.මට ඒක දාලා පොඩි බිලක් දෙනවද මොකද අපේ ගෙදර මහත්තයා බලයි මං ඉතුරු සල්ලි අරගත්තද?”” කියලා පොර අර කඩේ අයට කිව්වම කඩේ අයත් කඩේ බිලක් කඩලා දුන්නා.මතක තියා ගන්න සීල් එකත් ගහලයි දුන්නේ.

ඔන්න ඉතින් ටික දවසක් ගෙවීගෙන ගියා.පාර්ලිමේන්තුවේ බද්ද අනුමත වුනා.හරියටම ඊට පහු වෙනිදා රටේ සියලුම මේ බේකරි කඩේ ශාඛා වැටලුවා,

මොකෙන්ද පොලීසියෙන්ද?

නෑ.ආදායම් බදු එකෙන්.මොකද, අර ආපු පොර ආදාය්ම් බදු එකේ ලොක්කෙක්.

බද්ද අනුමත වෙන්න කලින් බද්දක් මිලට එකතු කරන්න බෑනේ.මිනිහා මේ බේකරි හිමියාගේ ඇම්ඩන් වැඩේ ඔප්පු කරන්න දෙන ප්‍රධානම සාක්ෂිය අර ඉල්ලගත්ත බිල.ආදායම් බදු එකේ නිලධාරින්(මෙයාලම තමයි VAT ගැනත් බලන්නේ)දුන්නා වැඩේ ලස්සනට.

Image

1බද්ද අනුමත වෙන්න කලින් බද්ද මිලට එකතු කරලා තියෙනවා.ඒක නීති විරෝධියි.ඒකට දඩ ගැහුවා.

2බද්ද අය කරන්න නම් බද්ද අය කිරීමට ලියාපදිංචි වෙලා ඉන්න ඕනේ.ඒක මෙතනදි වෙලා නෑ.ඒකට දඩ වලට අමතරව ලියාපදිංචි ගාස්තුවත් ගෙවන්න වුනා.

3මේ ව්‍යාපාරය ඒ කාලේ තිබ්බ විදිහට මේ බද්දට ඇතුලත් නෑ.ඉතින් බදු අය කරපු එක නීති විරෝධියි.ඒකට වෙනම දඩ.

4හරි හෝවැරදි හෝ බදු අය කරලා තියෙනවා.එහෙනම් ප්‍රමාද ගාස්තු එක්කම එකතු කරපු බද්ද ගෙවන්න වුනා.

Image

shakespeare.about.com

 

කොහොමද ආදායම් බදු එකේ වැඩ?මේ වගේ දෙයක් වුනාම සනීපයිනේ?

ශේක්ස්පියර් අද හිටියා නම් වැනීසියේ වෙලෙන්දා නාට්‍යයේ ෂයිලොක් වෙනුවට දාන කෙනා හිතා ගන්න පුලුවන්නේ.

සෙනසුරු අපලය හෙටයි.Saturn,what will be will be?

මේ දවස් වල ගොඩක් අය කේන්දර පස්සේ යනවා.සමහරු කේන්දරේ ඔලුව උඩ තියාගෙන.මංගල්‍ය උත්සවයක ඡායාරූප ශිල්පියා ලොක්කා වෙනවා වගේ සමහරුන්ගේ ජීවිතේ ලොක්කා වෙලා තියෙන්නේ කේන්දර කාරයො.ජෝතිශ්‍යය විශ්වාස කරනවටත් වඩා මගඩි කාරයෙක්ව ඔලුව උඩ තියා ගත්තම තමන්ට අපලේ වෙන්නේ ඒ මනුස්සයම තමයි.ඉතින් අද මං කියන්නේ ඔය ජෝතිශ්‍යය විශ්වාස කරන නොකරන හැමෝටම මේ අපලෙන් ගැලවෙන්න පොඩි උපක්‍රමයක්.මේක කතාවක් ඇසුරෙන් මං කියන්නම්.

Image

slaveofjesuschrist.me

හැබැයි මේ කතාව මගේ නිර්මානයක් නෙවෙයි.පුරාණ හින්දු කතාවක් විදිහට තමයි පැවතගෙන ඇවිල්ලා තියෙන්නේ.මේක ඒ විදිහටම කරලා බලන්න යන්න ඕන නෑ.ඒ වුනාට මේකේ අදහස ඔලුවට ගන්න පුලුවන් නම් එච්චරයි.

ජෝතිශ්‍යය ගැන උනන්දුවක් දක්වන අය වගේම නිකමට හරි මේ ගැන අහලා තියෙන අය දන්නවා අපල ගෙනත් දෙන ග්‍රහයො අතරින් ප්‍රමුඛතම ග්‍රහයා වෙන්නේ සෙනසුරු නැත්නම් ශනි කියන ග්‍රහයා බව.සෞර ග්‍රහ මණ්ඩලයේ පෘථුවියට පේන ග්‍රහයින් අතරින් ගත්තම ලස්සනම ග්‍රහයා වෙන්නේ සෙනසුරු ග්‍රහයා වුනාට ජෝතිශ්‍යය තුලදි සෙනසුරු සැලකෙන්නෙ පාප ග්‍රහයෙක් විදිහට.

Image

hdwallpapersinn.com

ඔය රාවණා කතාවටත් සෙනසුරුගේ සම්බන්ධයක් තියෙනවා.කොහොමහරි සෙනසුරු එක එක අයට අපල කර කර එනකොට දෙවියන්ගෙත් වාරය ආවාලු.ඕකේ එක අපලයකදි අර විෂ්ණු දෙවියන්ටත් බට කොල කන්න සැලැස්වීමත් සෙනසුරු ග්‍රහයගේ පිටින් ගිය විදිහට තමයි කතාවල කියවෙන්නේ.

ඔන්න සෙනසුරුට වාරය ආවලු ගණ දෙවියන්ට අපල කරන කාලය.ඉතින් සෙනසුරු ඔන්න කලින්ම ගණ දෙවියෝ ගාවට ගිහිල්ලා කිව්වලු ඔන්න හෙට ඉඳන් අපල කාලය ඇරඹෙනවා,කින්ද මන්ද සේරම ටික.

Image

samadhiyoga.net

කොහොමත් ද්‍රවිඩ සාහිත්‍යය තුල ගණ දෙවියන් සැලකෙන්නේ බුද්ධියට නැත්නම් නුවණට අධිපති දෙවියෝ කියලනේ.ඉතින් ගණ දෙවියෝ මේ සෙනසුරු ආවම කිව්වලු

ආ මට ඕවා මතක තියා ගන්න බෑ,ඒ හින්දා ඕක මගේ බඩේ ලියලා යන්න කියලා.නැත්නම් අමතක වෙයි කියලා.ඉතින් ඔන්න සෙනසුරුත් ගණ දෙවියන්ගේ බඩේ ලියලා ගියාලු

“”හෙට සිට අපලයි”” කියලා.

ඔන්න ඉතින් ඊළඟ දවසේ සෙනසුරු ආවලු ගණ දෙවියන්ට අපල කරන්න,වෙච්ච පොරොන්දුව පරිදි.ඇවිල්ලා කිව්වලු

ගණ දෙවියනි ඔන්න මම ආවා,අද ඉඳන් අපල කරන්න කියලා.එතකොටම ගණ දෙවියො කියනවලු

“”මොනවා අද ඉඳන්,වෙන්න බෑනේ,ඔබතුමාමනේ ලියලා ගියේ හෙට සිට අපලයි කියලා මේ.ඉතින් අද නෙවේ හෙට එන්න “”කියලා.

ඒ පාර තමන් ලියපු වගන්තිය දැකපු සෙනසුරු  යන්න ගියා,මොකද ඒකේ තියෙන්නේ හෙට සිට අපලයි කියලනේ.ඔන්න ඉතින් ඊළඟ දවසෙත් සෙනසුරු ආවලු පොරොන්දු වූ පරිදි අපල කරන්න.ඒ වුනාට එදත් ගණ දෙවියො පෙන්නුවලු අද නෙවෙයි හෙට සිට අපලයි කියලා.එදත් සෙනසුරු හැරිලා ගියා.

ඊළඟ දවසෙත්,ඊටත් පස්සේ දවසේ.ඔහොම ඉස්සරහට යද්දි සෙනසුරුටම තේරුනා ගණ දෙවියෝ තමනට අපල කරන්න බැරි වෙන්න ප්‍රයෝගයක් යොදලා කියලා.

මොකද හෙට සිට අපලයි කිව්වම ඒ හෙට කවදාවත් එන හෙටක් නෙවෙයිනේ.අන්තිමේදි ගණ දෙවියන්ව අපලෙන් බේරිලා තියෙනවලු.

දැං මේ කතාවේ හරය මොකක්ද?අපිත් සෙනසුරු අපලෙට බඩේ හෙට සිට අපලයි කිව්වම අපලේ දුරු වෙනවද?

නෑ ඒක නෙවෙයි මේ කියන්නේ.

සෙනසුරු නෙවෙයි මොන අපලේ වුනත් තමන්ට පුලුවන් නම් ඒ අපලය එක්ක සටන් වදින්න ඒකෙන් වෙන බලපෑම අවම කර ගන්න පුලුවන්.වඩා වැදගත් වෙන්නේ තමන්ගේ චිත්ත ශක්තිය.ඒ ඒ දෝෂය තියෙනවා කියලා වැලපෙමින් ඉන්නවට වඩා ඒකට කරන්න ඕන ප්‍රතිකර්ම මනාව කරානම් බලපෑම අවම කර ගන්න පුලුවන්.හැබැයි අද දවසෙදි ලංකාවේ සමහර ජෝතිෂ්‍ය ගල් ටික්කො කරන්නේ මේක විකුණ ගෙන විනාශ කරන එක.

එක්තරා පුද්ගලයෙක් ඉන්නවා ඔහු ලංකාවේ මැණික් වෙළෙන්දන්ගෙන් පලුදු වෙච්ච මැණික් ගල් ගන්නවා අඩුවට.ඒවා ඔහු අර අපලයට මේ අපලයට ගල් අල්ලලා මුදු හදා ගන්න එන අයට තමන් මැතුරුවා කියලා ලොකු ගානකට විකුණනවා,වෙන කොහෙවත් නෙවෙයි මේ කොළඹම තමයි.

හැබැයි ඒ වුනාට ඊටත් වඩා සාර්ථක හා දීර්ඝ කාලීන පිළියම් තියෙනවා.

ලංකාවේ එක්තරා ප්‍රසිද්ධ පුද්ගලයෙක්ට තමන්ගේ කේන්දරය අනුව ධනය කියන දෙය රඳවා තබා ගන්න බෑ.ඉතින් ඒ අනුව ගත්තම මේක බලන අය කියන්න ගත්තා කොච්චර සල්ලි හම්බ කළත් වැඩක් නෑ,නාස්ති වෙනවා කියලා.ව්‍යාපාර පටන් ගන්න එපා කියලත් අවවාද දෙනවා.ඒ වුනාට මනා ජෝතිෂ්‍ය දැනුමක් සහිත මෙයා කරන්නෙ  තමන් හම්බ කරන සල්ලි (මතක තබා ගන්න සේවා සපයන ව්‍යාපාරයක් මෙයා කරන්නේ),ලද සැනින් කුමක් හෝ ආයෝජනයක යොදවනවා.ඉඩම් ගන්නවා,වාහන ගන්නවා.ගොඩක් වෙලාවට ගන්නේ ලමයින්ගේ නමට.

ඉතින් අනාවැකිය හරි, මොකද සල්ලි රඳන්නේ නෑ.ඒ වුනාට අන්තිමට ඵලදායී දෙයක යෙදවිලා තියෙනවා.

තව සමහර අයගේ කේන්දර බලලා කියනවා ආ මෙයාට තුවාල වෙන්න තියෙනවා,ලේ හෙල්ලෙන්න තියෙනවා කියලා.ඉතින් හොඳම දේ තමන්ට හැකිනම් ලේ දන් දෙන්න.

 

මතක තියා ගන්න සෙනසුරු කියන්නේ අපල විතරක් කරන ග්‍රහයෙක් නෙවෙයි.අනික සෙනසුරු අපලය ලබපු පමනින් එයා විපතට පත් වෙන්නේ නෑ.ලග්න කේන්ද්‍රය වගේම නවාංශක කේන්ද්‍රය දිහාත් බලලා සෙනසුරුගේ බලය,එයත් එක්ක ඉන්න වෙන ග්‍රහයො, මොනවද බැලුම් හෙලන්නෙ මොන ග්‍රහයොද මේ සියල්ලත් බලලා නිගමනයකට එන්න.

 අනික වැදගත්ම දේ ජෝතිෂ්‍යය යනු හොඳ සේවකයෙකි,භයානක ස්වාමියෙකි.(කිව්වේ මංතුමා)